مشيت بش نشكي في المركز ضربوني وطردوني

باهي بإختصار و إيجاز؛ تو باش نحكي واقعه صارتلي الليله في مركز بئر شلوف نابل.. أنا لا تشديت نحرق و لا تشديت نتظاهر؛ أنا مشيت بساقيا للمركز باش نشكي بشخص، و ما حبيتش يصير محضر و سين وجيم و إيقاف.. طلبت منهم يمشيو للشخص هذا باش ينبهوه.. قالولي ستنى شويه.. قلتلهم الله يبارك و بقيت نستنى قرابة الساعتين و أنا مطيش و قلت ميسالش موش متفاضين نزيد نصبر.. و أنا قاعد شافني السيد المعتمد عيط لعون و قالو أقفو معاه راهو وليد باهي و مشى، مشكور سيد أحمد.. و نشوف فيهم يجيبو يكركرو في العباد أفواج أفواج و السب و الشتم و القذف و سبان الأم و الضرب.. أحنا هكك و جاء واحد يصور في الموقوفين، ياخي واحد منهم قال ما تصورونيش، يؤخر و يقدم و يلطخلو راسو فالحيط و يكفر عليه ربي، ياخي قام يصيح قالو ما عملت شيء ما عملت شيء، يكون باش يصورو بالقفى، دورو واحد شادو و واحد يضرب فيه بالكف و إلي يصور يضرب و يصور، و نتلفت للباب و نشوف في واحد جنش داخل يرفس كي الثور و يمشيلو و عينو ما ترى نور، دخل فيه بالكف و البونيه و المرفق، تقول زملاؤو مقمرين عليه يا يقتلو يا يخليه مقعد، أقسم برب الكعبه الجنش لي قلتلكم عليه و معاه قرابة السته و إلا سبعه بوليسيه متكلين عليه بالضرب و السب و لخرين قرابة عشره أعوان يغزرو و يضحكو.. داخ الطفل في القاعه و مازالو يضربو فيه بالبورتكانات و يبزقو عليه.. باهي نجيو للواقعه لي صارتلي تو، أنا قاعد نستنى و نغزر مصدوم مالمشهد.. يتلفتلي عون قالي شتعمل إنت فم؟ بقيت ساكت، قالي إنت باندي و يجيني الجنش لي كنت نحكي عليه و سألني نفس السؤال.. آنا جيت باش نتكلم و هو ركح فيا بالكف و سبان الأم و ضربني بمقص طحت، و من قوة الطيحه ما فهمتش شكون لي يضرب معاه، يجي رئيس مركز و إلا هو البحاث لي في بالو بيا و يجبدني منو و يقلي برا روح *** أمك و إلي مش تشكي بيه برا أقتلو.. خرجت مطبس خايف لا تجيني ضربه خاطيه.. أقسم بربي مشيت شويا و شدتني وجايع وليت نحبي أصل...
أما السيد لي ضربني نحب نقلك حاجه ما نجمتش نقولهالك في المركز خاطرك متخبي وراء الزي متاعك لي ماكش عطيه حتى طرف قيمه و إحترام، إنت ضلمتني و تعديت عليا و ماناش في بلاد عدل وقانون حتى نشكي بيك و تاخو جزاتك و تتجرد من زيك خاطرك ما تستحقوش، نحب نقلك حسبي الله و نعم الوكيل فيك و تلقاه في صحتك و نضرك و ذريتك هذا كان ربي حبك و عطاك ذريه أكيد.. أما كان ما فماش عدل في البلاد هاذي نوكل عليك ربي (العدل) لي هو بيدو ما سلمش من لسانك.
تنويه: الدم لي في ديا ما تسبب ليش بيه البوليس هذا.. أما ضربني و أنا في حالتي هاكي و كي طحت نزلي بساقو على صبعي طيرلي البصمه منين كانت جرح.